升小大抽獎, 有你份嗎?

June 8, 2015

大家好,我係鬍鬚叔叔,有個10歲仔仔,在直資小學讀4年級,曾經係嚴父,而家係道父(講道理既父親,哈哈),有機會能夠同各位閒話家常,分享10年來為父的苦與樂,家庭生活中既點滴,實在係一件愉快事。

 

處女作第一個話題比較特別,就係我係用口語寫文章的,而家好多小學都推行”普教中”,教育局話係”我手寫我口”,更容易掌握學習中國語文喎。現實生活中大家都係講廣東話,”我手寫我口”唔係應該係寫口語咩? 而且我由細到大,學中文都唔係普教中,我中文會考有B喎,如果”我手寫我口”係咁重要的話,用口語寫文章會更加親切同更好地表達情感,同意嗎?

轉下話題,呢兩日至Hit topic 一定係小學派位大抽獎,年年新聞都一定會採訪家長感受,上得電視嘅都一定係喊晒口,而喊嘅一係派到第一志願,一係第n個志願,收到派位結果那一刻,有人歡喜有人愁,每次睇到呢d場面,就會諗返起當年阿仔升小學既經歷。

 

想當年報左幾間直資,未有offer前要報首輪自行收生,而我地就報左我讀既小學,當其他家長都話”你係舊生實收你,你就好啦” 的時候,結果係抽唔中,果一刻心情其實幾矛盾。矛盾1:直資未有offer,自行又唔中,冇著落添,等大抽獎心裡面冇底,驚唔知派左去邊;矛盾2:其實我母校在過去幾年派band 1英中成績好好,原因就係一個字:勁谷,而作為我個仔個老豆,我好清楚知道一件事,就係好明顯我個仔唔係天生既練武奇才,谷佢=害佢,呢種矛盾既心情,大家感受到嗎?

 

不過既然唔中,再諗咩都係無謂,生活還是要繼續過下去,餘下既直資面試繼續見,同一時間開始了解其他學校情況,要預備填大抽獎排位了。

 

我地特別留意相對係屬於二線既學校,或者標榜小班教學,愉快學習既學校,希望阿仔可以在冇咁大壓力既情況下渡過小學生活。在了解過程中,我發現原來所謂小班教學都有25人,而我一直認為十幾個先算得上係小班(我認係我太天真),而所謂愉快學習既學校,聖誕假期都有二十幾樣功課,真係心都灰晒。

 

轉眼就差不多要交大抽獎排位表,兩公婆望住張form 嘆氣,到底應該點填呢? 頭腦好混亂,好不容易填好xx個志願後,突然電話響,收到心儀直資學校電話叫我地去2nd in 見校長,日子就係交表deadline前一日,心諗,天呀!!!你一定要幫我呀!!! 俗語話心誠則靈,見校長順利過關,得到寶貴既offer,返到屋企,即刻掉左張排位form落垃圾桶!!!

 

回想當年,心情尤如坐過山車,大起大落,而今日,我地其中一位同事都面對呢個大考驗,大家都默默為佢祝福,希望佢仔仔派到第一志願,結果如願以償,真係戥佢好開心!我問佢有冇喊呀,佢話冇喎,我問你做乜唔流眼淚呀,電視台可能會訪問你喎,佢答得我真係妙,佢話:電視台一定係訪問北區,一係就九龍城名校區啦…….哈哈,世事都被你看透了!!!

Please reload

Featured Posts

寫真的虛榮與價值觀

July 19, 2015

1/5
Please reload

Recent Posts
Please reload

Archive
Please reload

Search By Tags
Please reload

Follow Us
  • Facebook Basic Square

© 2018 by Honey Bee Family Club