寫真的虛榮與價值觀
每年書展都係好多家長掃貨好機會，而每年都總會有某d特別話題係會引起熱烈討論，特別係乜乜物物模寫真集，估唔到今年主角竟然係一位6歲既小妹妹。
坦白講，只得6歲既小朋友，其實知唔知自己做緊乜，我相信影相既時候佢係開心的，而本書出左街引起咁大反應佢又有咩感覺，我覺得佢未必有，簡單一句，稚子無辜，所以大部份人既矛頭都指向佢媽媽同攝影師，口硃筆閥，講到佢地十惡不赦咁，其實作為父母，應該點睇呢件事呢？
首先，人有虛榮心，自古有之，對於咁細既小朋友來講，已經有咁高公眾知名度，處理不當的話，後果可以非常可怕，對慣鏡頭出慣風頭，到佢再大d開始知道自己既價值時，就有可能會諗歪，特別係青春期時有自己思想諗法，父母已經冇辦法管束，因為虛榮心作祟而做出傷害自己既事，絕對係有可能的。
再講小妹妹媽咪既反應。 件事發展到風風火火之時，傳媒登左一份”監護人聲明”，而內容…….感覺就係”我乜都唔知，總之就係出版社衰啦” 似乎家長都係受害者。
作為父母，除左養育兒女，供書教學之外，最重要責任係保護佢地，同時亦教育佢地人生價值觀念，凡事有承擔即為其一。 實情係咪好似聲明裡面咁講，出版前冇睇過全書，只有佢地自己知，不過份聲明既立場就可圈可點，作為孩子既教導者，有膊頭，有承擔，係非常重要既價值觀，對於呢一點，我教仔時係非常重視的。
總括而言，每個父母都希望自己仔女有表現既機會，可以係運動場上，可以係社交場合，可以係鏡頭之前，希望各位家長保持理性，唔好將自己既期望過份投射在仔女身上，比佢地有發揮自己既空間吧。
