一年一度父親節
下星期日就係父親節了，大家安排左同爸爸慶祝未呢？又或者應該問，有冇任何意圖或企圖打算同你家爸爸慶祝呢？
(首先要利申：鬍鬚叔叔我本人對於各種各樣節慶係冇乜感覺的，甚至乎生日我都覺得冇乜需要慶祝，相對比較重視就只有過農曆新年同清明節。)
點解我問得咁得意？有冇任何意圖或企圖？ 好多年前我就已經發覺，每年母親節前我地都會見到電視有好多廣告，食肆零售各式各樣商舖都大鑼大鼓做宣傳推廣，母親真係好偉大，父親節又如何呢？ 廣告同宣傳都係有的，不過規模細好多，會特別在意諗點慶祝父親節既人亦一定比母親節少，始乎在一般人心目中，媽媽比爸爸重要。
普遍心態上錫媽咪多過錫爸爸係可以理解的，因為在上一代，媽咪主要係打理屋企家頭細務，照顧仔女日常生活，
屋企既貢獻係仔女眼睇得到的，而爸爸就在外打拼，放工返到屋企亦唔多幫忙做家務，爸爸既付出係仔女睇唔到的，所以一般人心裡面係錫媽咪多d。
而近年來我發覺呢種情況有幾顯著既改變，現代爸爸對屋企日常生活參與度高左好多，特別係照顧仔女，教育安排等等，(我就係一個典型例子)，阿仔同學裡面甚至有全職爸爸，呢種關係轉變可能同近年育兒理論裡面多左強調”親子關係”有關，每逢周末幼兒playgroup班就會見到好多爸爸抱小朋友黎上堂，而平日班裡面亦有不少係爸爸帶來的，世界在變，現代爸爸除左賺錢養家，亦多左承擔照顧仔女既責任，爸爸，其實都好偉大
自從10年前我做左爸爸之後，開始理解父母既心態，特別係阿仔3歲前真係要花好多精神時間照顧，更加深深感受” 眠乾睡濕揍大你個衰仔” 係點樣一回事，諗返起細個時做錯事爸爸依依哦哦，阿媽狠狠地教訓 (我屋企係調轉的)，其實都係愛既表現。
最後我想講，我相信每一位爸爸媽媽都希望仔女日子過得好，只要大家心裡面有父母，每一日都係父親節，母親節，唔係當日先同佢地飲茶先叫孝順既。
祝天下父親母親每日都快快樂樂!!!
