野生捕獲”憤怒的父親”

而家係香港做學生實在唔容易，除左功課默書測驗無日無之外，另一樣摧殘小朋友身心既惡魔，就係非常艱深既課程，教得快，學得深，我一直都非常好奇，其實讀得掂既學生係咪享受學習過程？

前幾日發生左一件真人真事，我遇上一個”憤怒的父親”。

果日同朋友午飯後去左另一個朋友開既café 坐下傾下偈。 我同呢位朋友因公事認識，亦識左唔係好耐，但有種一見如故既感覺，大家用我地既”母語”溝通係非常愉快的(呢度講既母語當然唔係廣東話，係乜請自己估下，哈哈)

上到去見到佢同客人傾緊生意，有講有笑，打個招呼，一切正常。 過左一陣送客走後過黎坐，寒暄幾句後開始講到阿仔開始考試要溫習，佢失驚無神連珠炮發用母語完美演譯出一個”憤怒的父親”，咩樹令佢咁激呢？因為佢前一晚見到讀小一既細仔要溫習既內容: 哇!!! 搞咩小一要串d咁深生字架!!!!!! 佢繼續爆發：”而家咩年代呀？ 食腦靠創作力既年代呀!!! 需要知識上google既年代呀!!! 仲背書？？？仲默生字？？？ 有咩可能而家一年級d野深過我以前咁多呀？？？ 咁既死背式學習，只會殺死創作力， 琴晚我真係好火呀，我仲打算叫阿仔唔好返學，一直唔返，等學校搵我，然後叫唔得掂出黎同我傾!!! @#$%^&**&^^%$#@! ………….”

如是者過左十幾分鐘之後，終於爆完。 我係非常認同佢所講的，但大家同在苦海之內，只能夠講深表同情，不過愛莫能助。我諗起有次同一位老板出去考察，佢經營一間幾有規模既工廠，生意做得算有聲有色，剛剛在新界買左幾塊地開發做悠閒農莊，未到40歲，腦筋轉數好快時

講野亦好快，我自問轉數唔慢，講野好多人都話快，但同佢傾野都要少少時間適應。 佢有個讀K1既女，好自然就傾到阿女將來讀小學問題，我又好自然講到而家香港家長面對既困難，佢講左幾句幾發人深省既說話： 讀書目的其實係乜野？為成績？為分數？為入大學？ 通通都唔係，讀書目的係明事理，將來賺唔賺到錢，有冇成就，係靠食腦!!!

我無意批評任何人與事，但眼見好多家長都不能避免被捲入呢個惡性循環裡面，真係幾擔心，高分低能不是夢，大家好好想一想，我地既小朋友身處呢個世界裡面，究竟係為何而學習呢？

P.S. 令到憤怒的父親咁憤怒既生字係caterpilla，事後問過幾個朋友呢個字點解，冇人答得出，而我只知道caterpilla 係出boot同衫的 :P

#爸爸 #媽媽 #教育